Povegliano Veronese

POVEGLIANO VERONESE su LARENA DOMILA

 

Comun a 15 km in diression sud-ovest da Verona, posissionà ne la parte setentrional de la Bassa Veronese 'ndoe anticamente gh'era paludi e caraterisà da la presensa de risorgive naturali che le da vita a un gran numaro de corsi d'aqua: el fiume Tartaro, i fossi Calfura, Giona, Bora, Draga, Liona, Moreta, Ladisa, Aqua Bassa, Gambisa, Fossona, Gambarela.

L'omo l'è presente a Poejan fin da la preistoria come pol testimoniar el siguréto del X secolo a.C. catà ne la zona e le necropoli de località Gambaloni e de contrà Vignol de la Gambisa con scheletri, armi in bronso, folende e utensili vari; in pratica 'ste antiche popolassioni le vivea su palafite in un teritorio pien de aqua e impaludà. Arente a 'ste do località jè stà catà dei scheletri, monede, armi tochi de lapidi de Epoca Romana; e propio de 'sto periodo l'è l'origine del toponimo "Poejan", da "Popilius" un militar roman conossudo come Caio Popilio Lenate de la Gens Popilia che nel 172 a.C. l'à traversà el Po con un esercito de Liguri che i avea ricevù la libertà e 'l parmesso de coltivar tere da 'ste parti.

urante tuta la dominassion romana gh'è sempre stà scontri mentre nel V° secolo le robe no jè andà al mejo 'isto el passajo dei Uni de Atila che i à scancelà el paese. Altre tombe jè stà catà a l'Ortaia de origine celtica, romana e longobarda. 'Pena jè rivà i Longobardi s'à 'isto la rinassita del vilajo distruto e propio de 'sto periodo jè le prime testimonianse scrite su Poejan, come quela del 763 che parla de 'na donassion "in vico Pubiliano" mentre quela del 774 parla de 'na vendita de beni "in fundi Publiano".  Del 846 e 861 jè i documenti del testamento del Conte Ingrimaldo da Arbedo 'ndoe el paese el vien ciamà "curtis", probabilmente Poejan l'era un vilajo fortificà. Nel 1037 l'Abate de l'Abassia de Nonantola el g'avea concesso a dei veronesi un poche de tere, ma con l'obligo de darghele indrio dopo la tersa generassion.

Nel 1136 quando Verona l'è deventà Comun Poejan l'era diviso tra l'Abassia de San Zen de Verona e un s-ciapo de feudatari mentre nel 1137 su 'na pergamena se lese par la prima 'olta de la presensa de la césa dei Santi Martin e Ulderico; de epoca carolingia l'era la prima césa esistente a Poejan la Basilica de Sant'Andrea andà in malora. Ne l'otobre 1154 Federico Barbarossa rivà in Italia l'à sponsà con i so soldà propio da 'ste parti e dopo la suplica spedì dal Vescovo de Verona Tebaldo, l'à riconfermà come scrito su 'n diploma i antichi privilegi e la gestion de 50 località ne la provincia, a la Césa Veronese. Verso la fin del XII secolo Poejan essendo al confin con Vilafranca s'à catà in meso a le guere tra Mantoa e Verona, stesso destin poco tempo dopo durante le bataje tra el Conte Sambonifacio e Eselin da Roman. 'Pena l'è rivà la signoria Scaligera in paese l'è rivà la paçe rinforsando l'economia. Poejan in 'sto periodo el risultava in possesso de Francesco fiol de Bartolomeo de la Scala mentre nel 1378 i Visconti i era riussidi a devastar el teritorio dopo aver butà zò le difese tra Vilafranca e Povejan de quel sistema difensivo ciamà "Serajo" costruì da Mastino II. Nel 1405 jè rivà i Venessiani e Poejan l'era soto el Distreto de Vilafranca mentre nel XVI secolo jè passà i soldà de la Lega de Cambrai scontrandose coi Venessiani, portando parò morte e distrussion anca in paese. E dopo l'introdussion de la coltivassion dei morari par i cavaleri che l'à dà 'na çerta sicuressa economica nel 1630 l'è rivà la peste che l'à dimesà la popolassion. Par el resto la vita l'è andà avanti in paçe fin a quando jè rivé i francesi e i austriaçi par el resto podemo segnalar che nel 1866 anca Poejan l'è deventà Italiana. Tra le cése da segnalàr la parochial dedicà a San Martin Vescovo del 1965 in sostitussion de quela vecia del 1780 costruida sora a 'n altra del '400. Interessante l'è el Santuario ne la frassion de la Madona de l'Ua Seca ligà a 'na legenda che, la ne conta de 'na vigna che la se sarìa secà parchè un contadin el s'à rifiutà de regalar a 'na dona che passava de lì un graspo de ua; quela dona in verità l'era la Madona. La césa l'è ricordà in documenti del XII secolo, conserva 'n afresco sora l'altar major che'l rafigura "La dormizione de la Vergine" forse de la scola de l'Altichiero e Avanzo da Zevio e do tele una de la scola de l'Orbetto e l'altra del Falceri. In verità el nome de la frassion sembrarìa derivar da 'na storpiadura del nome de la ceséta che gh'era prima ciamà "de la Via Seca", infati in antichi documenti se lese S.Maria vici sicci. Da segnalar anca do oratori, quel dedicà a la Concezion de la Beata Vergine ne la frassion Pignolà e quel dedicà al Redentor del 1630 al Dosso Regio. Tra le vile da segnalar la grande Vila.